“HARIE VAN DE BONGERD”

Harie Janssen, beater bekend es Harie van de Bongerd, woar ein van de oprichters van
CV de Katers Holtum. Sinds 1952 woar hea verbonje aan de vereniging en zörgde hea same mit de leeje van de Road van II veur de georganiseerde vasteloavend in Houtem.
De vasteloavend woar hem alles en doa leafde hea veur. Joare lank woar Harie de vaste
“chauffeur” van de prinsewaage. Vreuger mit ’t peard en later deeg den tractor zien werk.
Harie is nooit zelf prins geweas. Det deerde ‘m neet. Ziene trots woare zien (klein)kenjer,
wo der twea zelfs stevig actief zeen in de Raad van 11. Hea koos geneete van de sjoan momente zo es; ’t Auwt wiever bal, de diverse zittinge, de 4 buuttekampioentitels van Frank en John,
’t Prinsesjap van zien kenjer en kleinkenjer en ’t slap zeivere mit de luuj oet ’t dörp en wiet
doa boete.Harie woar, saame mit nog ein aantal auwt gedeende, ’t boegbeeld van de Houtumse vasteloavend. In zien bienoa 60 joar lidmaatschjap heat hea, mit veul leavesvreugd, biejgedrage aan ‘t veurbesjtoan van oos vereniging.Vööl ongersjeininge heat hea in de joare moge ontvange, mer ut belangriekste vonj hea toch ’t drage van DE KATER medaille.

De letste joare woare neet gemekkelik veur hem. ’t Ziektebeeld begoos baas te weare van Harie. Ondanks det hea wiej eine leeuw heat gevochte, is ’t hem op14 juni toch meister gewoore.

Harie, weer wille dich es letste earelid van CV de Katers hartelik danke veur diene tomeloze inzet veur de vasteloavend in Houtem. Weer blieve dich, allemoal op os eige meneer, altied in oos hart bewaare.

Harie, bedank veur alles.

Names ‘t besjtuur, leeje en dames van CV de Katers.